2023-ല് പാര്ലമെന്റ് പാസാക്കിയ വനിത സംവരണ നിയമം (നാരിശക്തി വന്ദന് അധിനിയം) പ്രാബല്യത്തില് വരുത്തി കേന്ദ്ര സര്ക്കാര് വിജ്ഞാപനം പുറപ്പെടുവിച്ചു.
ഈ നിയമത്തില് ഭേദഗതികൾ വരുത്താനുള്ള ബില് പാര്ലമെന്റില് അവതരിപ്പിച്ചിരിക്കെയാണ് വിചിത്ര നടപടി. 2023ല് പാസാക്കിയ ബില് രാഷ്ട്രപതി നേരത്തെ ഒപ്പ് വച്ചതോടെ നിയമമായിരുന്നു.
എങ്കിലും, നടപ്പിലാക്കുന്ന തീയതി പിന്നീട് എന്നാണ് അറിയിച്ചിരുന്നത്. സര്ക്കാരിന്റെ നീക്കം പ്രതിപക്ഷത്തെ സമ്മര്ദ്ദത്തിലാക്കാൻ ആണെന്നാണ് വിലയിരുത്തുന്നത്. കേന്ദ്രത്തിന്റെ നീക്കം വിചിത്രമാണെന്ന് കോണ്ഗ്രസ് വിമര്ശിച്ചു.
ഇന്നലെ രാത്രി വൈകീട്ടാണ് നിയമ മന്ത്രാലയം വിജ്ഞാപനം ഇറക്കിയത്. നിയമത്തില് ഭരണഘടന ഭേദഗതി നിര്ദേശിച്ച് കൊണ്ടുള്ള ബില് പാര്ലമെന്റില് ചര്ച്ച ചെയ്യുന്നതിന് ഇടയിലാണ് വിജ്ഞാപനം.
തികച്ചും വിചിത്രമായ നടപടിയാണ് കേന്ദ്ര സര്ക്കാരില് നിന്നുണ്ടായതെന്ന് കോണ്ഗ്രസ് നേതാവ് ജയറാം രമേശ് എക്സില് കുറിച്ചു. രാവിലെ പത്ത് മണിക്ക് പ്രതിപക്ഷ അംഗങ്ങളുടെ യോഗം കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ വിളിച്ച് ചേര്ത്തിട്ടുണ്ട്.
ബില്ലിന് മേലുള്ള വോട്ടെടുപ്പില് നിലപാട് തിരുമാനിക്കാനാണ് യോഗം. നിയമം പ്രാബല്യത്തില് വന്നുവെങ്കിലും ഇത് പ്രായോഗികമായി നടപ്പിലാക്കാൻ ചില സാങ്കേതിക തടസങ്ങള് നിലനില്ക്കുന്നുണ്ട്. നിയമം പൂര്ണ തോതില് നടപ്പിലാക്കണമെങ്കില് ആദ്യം രാജ്യത്ത് ജനസംഖ്യ കണക്കെടുപ്പ് പൂര്ത്തിയാക്കേണ്ടതുണ്ട്.
ശേഷം ലഭിക്കുന്ന കണക്കുകളുടെ അടിസ്ഥാനത്തില് മണ്ഡലങ്ങളുടെ പുനര്നിര്ണയം നടത്തിയാല് മാത്രമേ സംവരണം പ്രായോഗികമാക്കാന് സാധിക്കൂ. ഈ പരിമിതികള് മറികടക്കാനാണ് കേന്ദ്ര സര്ക്കാര് നിയമത്തില് ഭേദഗതി കൊണ്ടു വരുന്നത്.
കോണ്ഗ്രസ്, സമാജവാദി പാര്ട്ടി, തൃണമൂല് കോണ്ഗ്രസ്, ഡി എം കെ തുടങ്ങിയ പ്രധാന പ്രതിപക്ഷ കക്ഷികള് എതിര്ക്കുന്ന സാഹചര്യത്തില് പാര്ലമെന്റില് ബില്ല് പാസാക്കുക എന്നത് സര്ക്കാരിന് വലിയ വെല്ലുവിളിയാകും. ഈ സാഹചര്യത്തിലാണ് 2023ലെ നിയമം പ്രാബല്യത്തില് വരുത്തി കേന്ദ്രം വിജ്ഞാപനം പുറപ്പെടുവിച്ചിരിക്കുന്നത്.
News Desk
സൈബര് നിയമ പ്രകാരം അശ്ലീലവും നിയമ വിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കേണ്ടതാണ്. വായനക്കാരുടെ അഭിപ്രായങ്ങള് വായനക്കാരുടെത് മാത്രമാണ്.
Loading...please wait
